رئیس جمهوری تاجیکستان: «تهدیدات تروریستی» در مرز افغانستان افزایش یافته است
العربیه
امامعلی رحمان، رئیس جمهوری تاجیکستان هشدار داد که «تهدیدات تروریستی» در مرز تاجیکستان با افغانستان افزایش یافته است.
رحمان روز پنج‌شنبه 23 سنبله (شهریور) در نشست سران کشورهای آسیای مرکزی در شهر دوشنبه گفت که «تهدیدات تروریستی و قاچاق مواد مخدر» از افغانستان به تاجیکستان افزایش یافته و این باعث نگرانی است.
به گزارش خبرگزاری «اسپوتنیک»، رئیس جمهوری تاجیکستان گفته است: «تلاش‌های مداوم برای عبور تروریست‌ها و قاچاقچیان از مرز افغانستان به خاک تاجیکستان وجود دارد.»
امامعلی رحمان گفت: «اخیرا تروریست‌های جماعت انصارالله که با هدف انجام حملات تروریستی در دوشنبه در آستانه روز استقلال به خاک تاجیکستان نفوذ کرده بودند، کشته شدند.»
رحمان گفت: «تاجیکستان نگران افزایش تهدید‌های تروریستی است که از افغانستان سرچشمه می‌گیرد.»
به گفته او، پس از به قدرت رسیدن طالبان در افغانستان، میزان قاچاق مواد مخدر از این کشور به تاجیکستان نیز افزایش یافته است.
بنا بر گزارش‌های رسانه‌ای چهارشنبه گذشته سه عضو گروه موسوم به «جماعت انصارالله»، با تجهیزات نظامی، از مرز افغانستان وارد خاک تاجیکستان شدند که با واکنش نیروهای مرزی این کشور روبه‌رو شده و کشته شدند.
از طرفی ممتاز زهرا بلوچ، سخنگوی وزارت امور خارجه پاکستان نیز در نشستی پنج‌شنبه 23 سنبله (شهریور) از ورود تروریستان از خاک افغانستان به پاکستان انتقاد کرده و گفت: «پاکستان از تهدیدات امنیتی ناشی از افغانستان نگران است.»
بلوچ گفت: «در ششم سپتامبر به شمول رویداد امنیتی در چترال، در همان روز حادثه‌ای در مرز نیز به وقوع پیوست. ما معتقدیم که چنین حوادثی باعث گستاخی تروریستان می‌شود و بنابراین بسیار مهم است که مقامات اداره موقت افغانستان اطمینان حاصل کنند که از خاک افغانستان علیه پاکستان استفاده نمی‌شود.»
مقامات طالبان تاکنون در این باره اظهارنظری نکرده‌اند.
گفتنی است که پاکستان اخیرا گذرگاه مرزی «تورخم» با افغانستان را به دلیل درگیری نیروهای مرزی طالبان با مرزبانان این کشور برای حدود 9 روز بسته و دیروز پنج‌شنبه دوباره بازگشایی کرد.
| 